انا نازل يوم الاثنين ونبتى هتكون لله وولنصرة المظلوم

السلام عليكم

تعالوا كلنا نتجرد ونخلى نيتنا لله فى وقفة يوم الاثنين القادم

__ ناس كتير اتظلمت فى شركتنا دى واتفصلت بدون سبب ومرجعتش لحد النهاردة
__ ناس كتير اتظلموا فى شركتنا دى لما رفعوا قضايا يطالبوا بحقوقهم تقوم الادارة تخصم منهم وتنكل بيهم وتفاوضهم على التنازل رغم ان القضاء رمز العدل
__ ناس كتير اتظلمت فى شركتنا دى لما تعبت ومعرفتش تتعالج والتعب عندهم بيتفاقم وخصوصا امراض الغضاريف والانزلاقات الغضروفيه والخشونه فى المفاصل بسبب العمل
__ناس اتظلمت فى شركتنا دى لما راحت تعمل عمليات تافهه وتموت بسبب خطأ طبى والسبب فيه ان الدكاترة اللى بيعملوا العمليات درجه عاشرة والشركة رافضه تدفع
__ اطفال ايتام اتظلموا فى شركتنا دى لما زملاءنا يتوفاهم الله ويتصرف ليهم مبالغ اقل بكثير من اللى بيصرف لأقرانهم اللى فى الوظائف العليا رغم انه صندوق واحد وكلها فلوسنا
__ ناس كتير اتظلموا فى شركتنا دى لما اترموا فى البنزينات فى الشوارع وملقوش مكان يشتغلوا فيه وحسوا ان كرامتهم اتهانت
__ ناس كتير اتظلموا فى شركتنا دى لما اخدوا مؤهلات عليا ورفضت تعتمدها ليهم رغم انها اعتمدها لزملاء ليهم وبيضيعوا مجهود دراسه 4 سنين فى الارض
__ ناس كتير اتظلمت فى شركتنا دى لما اشتغلت وبذلت مجهود وبتقعد لحد 3.30 واسمها يتشال من الترقيات بدون سبب ويترقى ناس واخده 6 شهور اجازة فى نفس السنه
__ ناس كتير اتظلمت فى شركتنا دى لما راحت الخدمة العسكرية وعملت حفظ وظيفه وترجع تلاقى نفسها اترمت فى الشارع علشان خدمت فى الجيش المصرى
__ ناس كتير اتظلمت فى شركتنا دى معاهم ليسانس حقوق والشركة مش راضيه تديهم مجرد ورقه علشان يوقفوا اوضاعهم فى النقابة وعملتها لزملاء تانيين رغم انهم كلهم محدش فيهم شغال فى الشئون القانونيه وبيضيعوا عليهم معاش شهرى من النقابه حوالى 2000جنيه

انا نازل يوم الاثنين ونبتى هتكون لله وولنصرة المظلوم

قال الله

وَلا تَرْكَنُوا إِلَى الَّذِينَ ظَلَمُوا فَتَمَسَّكُمُ النَّارُ وَمَا لَكُمْ مِنْ دُونِ اللَّهِ مِنْ أَوْلِيَاءَ ثُمَّ لا تُنْصَرُونَ)

عن النبي صلى الله عليه وسلم قال: “إِنَّ النَّاسَ إِذَا رَأَوُا الظَّالِمَ فَلَمْ يَأْخُذُوا عَلَى يَدَيْهِ أَوْشَكَ أَنْ يَعُمَّهُمُ اللَّهُ بِعِقَابٍ.
انا هسمع كلام ربنا وكلام النبى ونازل بادب واحترام ودينى اللى بيحركنى اجيب حق المظلوم اللى اتفصل و اللى مرض و اللى مات واللى اتيتم و اللى كرمته اتهانت واللى مخدش حقه زى زمايله واللى خدم جيش بلده
ياريت كلنا ننزل ونتحرك ونخلى نيتنا لله وربنا هيوفقنا

Advertisements